რა ვისწავლოთ jQuery–ის შემდეგ

გილოცავთ jQuery-ის შესწავლას! თქვენ შეისწავლეთ დღეისთვის ვების ყველაზე პოპულარული JS ბიბლიოთეკა. გარდა იმისა, რომ შეძლებთ თქვენი ვებსაიტების jQuery-ის საშუალებით დაწერას, ასევე შეძლებთ, უფრო მარტივად გაიგოთ სხვა ვებ დეველოპერების მიერ დაწერილი კოდი და შეისწავლოთ ახალი JS ბიბლიოთეკები.

ამ კურსში ჩვენ ნამდვილად არ დაგვიფარავს jQuery-ის მთლიანი მასალა - არსებობს სხვა ფუნქციები და ფუნქციების პარამეტრები, რომლებიც არ გვიხსენებია. გადახედეთ თქვენ მიერ გამოყენებული ყოველი ფუნქციის დოკუმენტაციას და დარწმუნდით იმაში, რომ ფლობთ მისი გამოყენების ყველა გზას.

შეგიძლიათ, დამატებით სახელმძღვანელოებსაც გადახედოთ - ბევრი მათგანის მასალას, ალბათ, ექნება თანაკვეთა იმ ცოდნასთან, რომელიც აქ მიიღეთ, მაგრამ ზოგჯერ სხვადასხვა წყაროდან ინფორმაციის მიღება გვეხმარება.

jQuery შესანიშნავი ბიბლიოთეკაა, რომელსაც ნამდვილად ბევრი რამის გაკეთება შეუძლია, თუმცა ყველაფრის არა. მრავალი ვებ დეველოპერი იყენებს კონკრეტული დავალებისთვის განკუთვნილ ბიბლიოთეკებს ან UI ვიჯეტებს. ამ ბიბლიოთეკების დიდი ნაწილი დაწერილია სპეციალურად jQuery-ისთვის, ამიტომ ჩვენ მათ ვეძახით „jQuery დანამატებს". იმისათვის, რომ გამოიყენოთ jQuery დანამატი, პირველ რიგში, უნდა დაამატოთ თქვენს HTML გვერდში jQuery-ის script ტეგი, შემდეგ კი script ტეგი, რომელიც მიუთითებს js დანამატის ფაილზე. ჩატვირთეთ jQuery დანამატამდე. ამ ყველაფრის შემდეგ თქვენი კოდიდან გამოიძახეთ jQuery-ის დანამატის ფუნქციის სახელი. მაგალითი შეგიძლიათ, იხილოთ აქ.

დანამატების საპოვნელად შეგიძლიათ, ინტერნეტში მოიძიოთ „jQuery plugins [სასურველი ფუნქციონალი]", მაგალითად: „jQuery plugin datepicker" ან მოძებნოთ npm jquery plugin packages. ზოგჯერ იპოვით რამდენიმე დანამატს, რომლებიც იმას აკეთებენ, რაც თქვენ გსურთ -- მსგავს შემთხვევებში შეგიძლიათ, დანამატის ასარჩევად გამოიყენოთ ეს რჩევები.

კიდევ ბევრი ბიბლიოთეკაა სასწავლი, რომლებიც დაგეხმარებათ უფრო ძლიერი ვებგვერდების შექმნაში - როგორიცაა ბიბლიოთეკები მონაცემთა ვიზუალიზაციისათვის ან ბიბლიოთეკები კოდის არქიტექტურისთვის. წაიკითხეთ ჩვენი ბიბლიოთეკების სია და გამოსცადეთ მეტი მათგანი!